Kommunal xidmətlərdə fasilə yaranmaması üçün qurumlar hansı tədbirlər görüblər?

Havaların soyuması ilə əlaqədar bəzən kommunal xidmətlərdə ara-sıra fasilələr yaranır.

Vətəndaşlar işığın verilməsində problemlər, su xətlərində donma səbəbindən fasilələr, eləcə də qaz təchizatında müvəqqəti kəsintilərdən şikayətlənirlər.

Məsələ ilə bağlı aidiyyəti qurumlar bildiriblər ki, qış mövsümündə bu kimi halların qarşısının alınması məqsədilə qabaqlayıcı tədbirlər görülür.

İri Şəhərlərin Birləşmiş Su Təchizatı Xidmətindən Liderxeber.az-ın sorğusuna cavab olaraq bildirilib ki, qış aylarında su təchizatı sistemində yarana biləcək problemlərin aradan qaldırılması istiqamətində fəaliyyət davam etdirilir:

"Əsasən kanalizasiya kollektorlarının yuyulması, baxış quyuları və yağış barmaqlıqlarının təmizlənməsi işləri həyata keçirilir. Bu tədbirlər nəticəsində xətlər intensiv yağışlar zamanı həm yağıntı sularını həm də tullantı sularını maneəsiz şəkildə daşıya bilir. Eyni zamanda, kanalizasiya nasos stansiyaları təftiş olunur, mexaniki avadanlıqlar saz vəziyyətə gətirilir.

Qış aylarında əsasən problemlər sayğaclar və magistral paylayıcı şəbəkələrdə baş verən donvurmalar nəticəsində yaranır. Primitiv qaydada çəkilmiş su xətlərinin əksəriyyətində izolyasiya tələbi nəzərə alınmır. Tövsiyəmiz odur ki, həmin xətlər ya izolyasiya olunmalı, ya da torpaq altına keçirilməlidir.

İstehlakçıların diqqətinə çatdırırıq ki, fərdi yaşayış evlərində, həyətyanı sahələrdə, kommersiya obyektlərində quraşdırılmış sayğacların şaxtalı günlərdə donvurma nəticəsində sıradan çıxmasının qarşısının alınması üçün zəruri və qabaqlayıcı tədbirlərin görülməsi vacibdir. Şaxtanın daha çox olduğu gecə saatlarında sayğac içərisində suyun qalmamasına görə sayğacın giriş ventili bağlanmalı, çıxış ventili açıq saxlanılmalı, sayğac qutusunun qapağı bağlı qalmalıdır. Donvurmadan mühafizə tədbirləri məqsədilə açıq havada qalan boruları, sayğacın özünü isti materiallarla örtmək, qutunun içərisini ağac yonqarı ilə doldurmaq vacibdir".

"Azərişıq" Açıq Səhmdar Cəmiyyətindən isə qeyd olunub ki, 365 gün 24 saat qəza xidməti daim hazır vəziyyətdə olur:

"Külək nəticəsində ağacların xəttin üzərinə aşması və yaxud da kənar əşyaların xətti zədələməsi hadisəsi baş verməsə, heç bir halda işığın verilməsində fasilə olmur. Belə hallar olduğu təqdirdə də saatından aslı olmayaraq, qəza xidməti dərhal hərəkətə keçir və ən qısa vaxtda işıq bərpa edilir".

"Azəriqaz" İstehsalat Birliyindən vurğulanıb ki, hər il mayın 1-dən noyabrın 1-dək qış fəslinə hazırlıq prosesi həyata keçirilir:

"Proses çərçivəsində yeraltı qaz xətlərinin yerüstü dayaqlar üzərinə qaldırılması, boyanma işləri, korroziyaya uğramış hissələrin yeni boru xətləri ilə əvəz olunması, siyirtmələrin, şkafların sazlığının yoxlanması prosesləri həyata keçirilir. Bütün bu proseslərin hamısı payız-qış mövsümündə abonentlərin davamlı və fasiləsiz qazla təmin olunmasına xidmət edir. Bu il də eyni işlər icra olunub. Görülən işlərin nəticəsinə uyğun, demək olar ki, ölkə ərazisinə soyuq hava kütləsi daxil olandan bəri "Azəriqaz" İstehsal Birliyinin abonentləri ciddi problem yaşamayıblar. Bəzən lokal xarakterli problemlər olur.

İstismar olunan boru xətləri hansısa səbəblərdən sıradan çıxa bilər, digər nəqliyyat vasitələrinin qaz xətlərinə çırpılması nəticəsində qısamüddətli lokal problem ola bilər. Hər hansı iş görülən zaman müəyyən səbəblərə görə boru xətlərində zədələnmələr müşahidə oluna bilər. Bu tip xırda lokal xarakterli problemlər istisna olunmur. Abonentlər geniş mənada problem yaşamır və yaşamayacaqlar. Təzyiqin aşağı olması ilə də bağlı lokal xarakterli müraciətlər olub. İstər müxtəlif platformalar vasitəsilə abonentlərin müraciəti əsasında, istərsə də əməkdaşlarımızın müşahidəsi nəticəsində aşkar olunan mövcud problem dərhal aradan qaldırılıb. "104" çağrı mərkəzimiz də 24 saat fəaliyyət göstərir. Bu tip problemlər yaşandıqda vətəndaşlar müraciət edərək onun aradan qaldırılması istiqamətində işçilərimizə dəstək ola bilərlər".