Dünyanın ən uzun piyada körpülərindən biri açıldı

Finlandiyanın paytaxtı Helsinki şəhərində yeni infrastruktur layihəsi istifadəyə verilib.

Liderxeber.az xəbər verir ki, Kruunuvuorensilta adlı yeni körpü Korkeasaari ilə Kruunuvuorenranta ərazilərini birləşdirərək, şəhərin nəqliyyat və piyada əlaqələrini xeyli asanlaşdırır.

1191 metr uzunluğa malik körpü dünyanın ən uzun piyada körpülərindən biri hesab olunur. Layihə yalnız piyadalar, velosipedçilər və ictimai nəqliyyat üçün nəzərdə tutulub, avtomobillərin hərəkətinə icazə verilmir.

Yeni keçid sayəsində Kruunuvuorenranta ilə şəhər mərkəzi arasındakı məsafə xeyli qısalıb, əvvəl 11 kilometr olan yol indi təxminən 5,5 kilometrə enib.

Helsinki meri Daniel Sazonov körpünü şəhər üçün “yeni, unikal və cəlbedici məkan” adlandırıb. Onun sözlərinə görə, yeni infrastruktur Laajasalo və Kruunuvuorenranta rayonlarını şəhər mərkəzi ilə daha inteqrasiya olunmuş şəkildə birləşdirir.

Körpüyə böyük maraq göstərilib və 50 min nəfərdən çox insan yeni keçidi ziyarət edib.

Helsinkidə son aylarda digər mədəni və turistik obyektlər də istifadəyə verilib. Bunlara tarixi Yrjönkatu Üzgüçülük Hovuzunun yenidən açılması, Seurasaari Açıq Hava Muzeyi ərazisində yay kottecinin ziyarətçilərə təqdim olunması və Helsinki Mərkəzi Dəmir Yolu Stansiyasında yeni restoranın açılması daxildir.

Eyni zamanda, ötən il istifadəyə verilən “Waldorf Astoria Helsinki” hoteli də şəhərin turizm imkanlarını genişləndirən yeni məkanlardan biri kimi diqqət çəkir.