Ermənistanın qurtuluşunun real yolları

Ermənistan cəmiyyəti və ermənilər aldadılıb. Qafqazda, xüsusən Azərbaycan torpaqlarında yerləşdirilmələrinin təşkilatçıları onlara əlçatmaz vədlər verməklə yalan deyiblər. Həmin xülyalarla iki yüz ildir bu xalqın nümayəndələri yaşayıb.

Nifrət, kin kimi mənfi emosiya ilə tərbiyə olunub, sayları yetməyən və heç vaxt da yetməyəcək ərazi iddialarıyla böyüyüblər. Azərbaycan torpaqlarının bir hissəsində onlara dövlət quranların Xəzərədək əraziləri də onlara peşkəş edəcəklərini düşünürdülər. Başqa sözlə, erməni etnik qrupu Rusiyanın sayəsində dövlətə malik olub. Yəni onlara verilən Azərbaycan torpaqlarında bayraq ucaldıb, dövlət qurublar.

Bununla kifayətlənə də bilərdilər. Ancaq bu onlara azlıq edib. Konstitusiyalarına qonşu dövlətlərin ərazilərinin birləşdirilməsi kimi beynəlxalq normaları pozan müddəa belə daxil ediblər. Bu ölkənin əsas qanunu təcavüzkarlıq ideyasının bütün istiqamətlərdə mənbəyidir.

Ermənistanın dövlət olaraq əsası yoxdur. Onun bazası Azərbaycan torpaqlarını ələ keçirmək, türk düşmənliyi və qondarma soyqırımı ideyaları üzərində formalaşıb. Bunlardan birinin sıradan çıxması onlar üçün domino effektini verir.

Azərbaycan əsgəri 44 günlük müharibədə Ermənistanı silkələdi. Qələbə onlara düşünmək üçün imkan verdi. Həmin dövrdə bəhs etdiyimiz yalan və saxta xülyaların yaradıcıları, havadarları belə Ermənistanı məğlubiyyətdən xilas edə bilmədi. Zaman, tarix və şərait ədalətin bərqərar olmasını da diktə etdi.

Uydurmaları yuxuda görmək istəyən erməni cəmiyyəti həmin hadisələrdən sonra hələ də mənasız ideyaların arxasınca yürüyür. Keşiş Baqrat Qalstanyanın başladığı “Vətən uğrunda Tavuş” şüarı altında keçirilən aksiyaya qoşulurlar. Bu aksiya həmin təcavüzkarlıq düşüncəsinin davamıdır. Azərbaycan torpaqlarına olan özlərinin və havadarlarının işğalçı niyyətlərini Nikol Paşinyana istefa tələbi ilə ört-basdır etməyə səy göstərirlər. Bu, fəaliyyətin arxasında duranlar daim ermənilərin maraqlarının təmin olunması düşüncəsi altında başqalarının tapşırıqlarını icra ediblər. Çünki Ermənistan dövləti onlara bu xidmət görə verilib.

Baş nazir Nikol Paşinyan çıxışlarında “artıq dövlətimiz var, bunu inkişaf etdirməyi düşünməliyik deyəndə” yəqin elə mövcud ölkəsinin başqa istiqamətlərdən əl çəkməyi təklif edir.

N.Paşinyan bu günlərdə hakim “Vətəndaş müqaviləsi” partiyasının forumunda etdiyi çıxışda bu məsələyə toxunub.

O bildirib ki, Ermənistan xalqı artıq döyüşmək, əziyyət çəkmək və özünü qurban vermək istəmir, sadəcə yaşamaq istəyir. Bunu yeni siyasi reallıq olaraq ideoloji reallığın əsasları olduğunu qeyd edib. Paşinyan bunu xalqının elitaya və hakim çoxluğa mesajı olduğunu söyləyib.

Bu həm də müharibədən sonra “Ermənistan xalqı indi nə istəyir” sualına müəyyən mənada cavabdır. Çünki Azərbaycanın Qarabağ və ətraf rayonlarını işğal altında saxlayıb, Ermənistana qatmağa onlar nail ola bilmədi. Reallaşması mümkün olmayan bu ideyadan sonra erməni xalqı özü üçün çıxış yolu tapmağa başlayıb. Bəziləri mühacirətə üstünlük verib. Bir qismi mövcud hakim siyasi elitanı qəbul edib, bir qismi isə hələ də keçmiş prezidentlər - Robert Koçaryan və Serj Sarqsyanın yalan vədləri ətrafında fırlanırlar.

Paşinayn həmin çıxışında cəmiyyətin istəklərindən bəhs edərək deyib ki, xalq uşaqlarının xoşbəxt və firavan yaşamalarına şərait yarada bilib-bilməyəcəklərini hakimiyyətdən soruşur. O vurğulayıb ki, bu suala yalnız dövlət cavab verə bilər.

Baş nazir hesab edib ki, hakimiyyətin təqdim etdiyi real Ermənistan ideyası xalqdan alınıb. Onun sözlərinə görə, bu ideya ona və ya partiyasına deyil, Ermənistan cəmiyyətinə məxsusdur.

Baş nazir adını çəkmədən keşiş Baqratın yürüşlərindən bəhs edərək deyib ki, xalq real Ermənistana üstünlük verdiyi üçün hərəkat uğursuzluğa düçar olub: “Həyat ideologiyasını dövlət ideologiyasına çevirmək, vətəndaşların yaxşı yaşamaq istəyinə azadlıq vermək lazımdır”.

Paşinyan əlavə edib ki, təcrid olunmuş elitalar özlərinin və ya başqalarının yaratdığı ideologiyaları xalqa tanıtmağa çalışır, çox vaxt onları zorakılıq yolu ilə tətbiq edirdilər.

Baş nazirin bu çıxışı erməni cəmiyyətinin real vəziyyətini əks etdirir. Ermənistanın dövlət olaraq mövcudluğunu qoruması üçün aşağıdakı məsələlər real sayılır:

- Qonşu dövlətlərə ərazi iddiasından birdəfəlik imtina etmək;

- uydurulmuş tarixdən əl çəkmək;

- türkləri düşmən gözündə görməmək;

- regional əməkdaşlığa üstünlük vermək;

- beynəlxalq öhdəliklərə əməl etmək;

- konstitusiyada islahat aparmaq, yaxud onu dəyişmək;

- Cənubi Qafqazda casus-dövlət rolu oynamaqdan əl çəkmək;

- xarici qüvvələrin aləti olmaqdan qurtulmaq;

- repatrasiya prosesinə ədalətli yanaşmaq və s.

Bunları həm də erməni cəmiyyətinin yenilənməsi, etimad və etibar qazanması üçün əsas saymaq olar. Nikol Paşinyan real Ermənistanı bu şərtlərə əməl edəcəyi halda qura bilər. Əks halda erməni cəmiyyəti bütün işlərə yenidən başlayacaq.