Ağ ev hökumət fəaliyyətinin mümkün dayanmasına hazırlaşmağa başlayıb

ABŞ Prezidenti Cozef Baydenin administrasiyası federal hökumətin fəaliyyətinin mümkün dayanmasına hazırlaşmağa başlayıb ki, bu da parlamentarilərin ayın sonuna qədər onun maliyyələşdirilməsinin uzadılması ilə bağlı razılığa gələ bilməməsi halında baş verə bilər.

Bu barədə “The Washington Post” öz mənbələrinə istinadən məlumat yayıb.

Onların sözlərinə görə, Ağ evin İnzibati-Büdcə İdarəsi (İBİ) federal qurumların rəhbərlərinə maliyyənin dayandırılması halında fəaliyyət planlarını yeniləməyi tövsiyə edib, həmçinin işçiləri cari vəziyyət barədə məlumatlandırmaq üçün istifadə edə biləcəkləri məktub layihəsi hazırlayıb.

Nəşr qeyd edir ki, hökumətin maliyyələşdirilməsi dayandırıldıqdan sonra milyonlarla dövlət işçisi və hərbi qulluqçu maaş almayacaq və federal proqramlar - qida keyfiyyətinin yoxlanılmasından tutmuş uşaq baxımı fondlarına qədər - dayandırılacaq. Eyni zamanda, onlardan bəziləri işə getməli olacaqlar, lakin onlar yalnız qanunvericilər maliyyələşmənin uzadılmasını təsdiqlədikdən sonra əməkhaqqı alacaqlar.

Bundan əlavə, bəzi milli parklar və muzeylər bağlana bilər və ölkə üzrə hava limanlarında fasilələr və gecikmələr yaşanacaq.